МЭНДЧИЛГЭЭ

 

Дэлхийн дайдад дуурсагдах хүн хөгжим “Монгол хөөмэй”-н өлгий, Хан Жаргалант Хайрхан Бумбат уулсаа нөмөрлөсөн, хатан Хар ус, Хар, Дөргөн нуураар эмжээрлэн байгалийн өнгө тогтоц хослон заяасан Чандмань нутгийн олон түмэн та бүхний амар амгаланг эрэн мэндчилье.  

Бид бүхэн Сумын ИТХ-ын анхдугаар хуралдаанаар 2017-2020 онд хэрэгжүүлэх Сумын Засаг даргын мөрийн хөтөлбөрийн 5 бүлэг 155 заалт бүхий төлөвлөлтийг боловсруулан батлуулж, хамтран хэрэгжүүлэхээр ажиллаж байна. Сум орон нутгийнхаа эдийн засаг, нийгмийг хөгжүүлэх, ард иргэдийн амьдрал ахуйг дээшлүүлэхэд чиглэсэн бодлогын болон бодит ажлуудыг эхлүүлэх, өмнө нь үр дүнтэй хэрэгжиж байсан үйл ажиллагааг үргэлжлүүлэх, иргэдийн амьдралд хүлээгдэж буй боломжуудыг үр дүнтэй болгоход чиглэгдсэн ажлуудыг хийж хэрэгжүүлэх, бодит үр дүнд хүргэхээр хичээн ажиллаж байна. Бидний хамтын ажиллагаа,  шинэлэг санал санаачлагууд, халуун сэтгэл, зөв удирдлага зохион байгуулалт нь “Сум орон нутгийн хөгжлийн түүчээ” болох учиртай. 

Чандмань нутгийн уугуул, суугуул ард иргэд та бүхнийг Сумын Засаг даргын мөрийн хөтөлбөр, Сумын хөгжлийн хөтөлбөр, орон нутгийн  хөгжлийн талаар санал бодлоо бидэнтэй хуваалцаж  хамтран  ажиллана гэдэгт гүнээ  итгэж байна.

Та бүхний үйлс бүхэн бүтэмжтэй байж, юу санасан есөн цагаан хүсэл сэтгэлчилэн гийх болтугай. Гэгээн үйлсийн мөр бүхэн бүтэн, үр шим нь дүүрэн байг.

 

                                                                                                     ЧАНДМАНЬ СУМЫН

                                                                    ИТХ-ЫН  ДАРГА                                                            ЗАСАГ ДАРГА   

                                                                                            Б.ЧИНБАТ                                                                      Б.ГАЛБАДРАХ